ಶಿಲ್ಪಾ ಶೆಟ್ಟಿಯ ಗುಡ್ ನ್ಯೂಸ್ !

‘ಮದುವೆ ಆಗಿ ಇಷ್ಟು ದಿನ ಆಯ್ತು, ಏನು ಗುಡ್ ನ್ಯೂಸ್ ಇಲ್ವಾ? ...’ಅಂತಾ ಕುಡ್ಲದ ಪೊಣ್ಣು ಬಾಲಿವುಡ್ ನಟಿ ಶಿಲ್ಪಾ ಶೆಟ್ಟಿ ಯಲ್ಲಿ ಯಾರೆಲ್ಲ ಪ್ರಶ್ನೆ ಕೇಳುತ್ತಿದ್ದಾರೋ ಅವರಿಗೆಲ್ಲ ಶಿಲ್ಪಾ ಶೆಟ್ಟಿ ಗುಡ್ ನ್ಯೂಸ್ ಬಿಟ್ಟು ಕೊಟ್ಟಿದ್ದಾರೆ. ಅದೇನ್ ನ್ಯೂಸ್ ಅಂತೀರಾ.. ಮುಂದೆ ಓದಿ...

‘ಮದುವೆ ಆಗಿ ಇಷ್ಟು ದಿನ ಆಯ್ತು, ಏನು ಗುಡ್ ನ್ಯೂಸ್ ಇಲ್ವಾ? ...’ ಅಂತಾ ಕುಡ್ಲದ ಪೊಣ್ಣು( ಕರಾವಳಿಯ ಹುಡುಗಿ) ಶಿಲ್ಪಾ ಶೆಟ್ಟಿ ಹೋದ, ಬಂದ ಕಡೆಗಳಲ್ಲೆಲ್ಲಾ ಇಂಥದ್ದೊಂದು ಪ್ರಶ್ನೆ ಎದ್ದು ನಿಲ್ಲುತ್ತದೆಯಂತೆ. ಶಿಲ್ಪಾಳಿಗಂತೂ ಈ ಪ್ರಶ್ನೆಗಳಿಗೆ ಅನ್ಸರ್ ಕೊಟ್ಟು ಕೊಟ್ಟು ಸಾಕೋ ಸಾಕಾಗಿ ಹೋಗಿದೆ. ಅದರಲ್ಲೂ ಮಾಧ್ಯಮಗಳು ಇದೇ ವಿಚಾರದ ಮೇಲೆ ಮತ್ತೆ ಮತ್ತೆ ಕಟುಕಿದಾಗ ಮಾತ್ರ ಶಿಲ್ಪಾ ಕಂಗಾಲಾಗಿ ಹೋಗುತ್ತಾರಂತೆ ! ಆದರೆ, ಈಗ ಶಿಲ್ಪಾ ಅದೆಲ್ಲವನ್ನೂ ತಲೆಯಿಂದ ಹೊರಹಾಕಿ ತನ್ನ ಚಿತ್ರಗಳ ಕಡೆಗೆ ಗಮನ ಕೊಡುತ್ತಿದ್ದಾರೆ ಎಂದು ಟ್ವಿಟ್ಟರ್ನಲ್ಲಿ ಶಿಲ್ಪಾ ಟ್ಟಿಟ್ ಮಾಡಿದ್ದಾರೆ.
ಆದರೆ ಮಾಧ್ಯಮವೊಂದರಲ್ಲಿ ಶಿಲ್ಪಾ ಶೆಟ್ಟಿ ನೀಡಿದ ಸಂದರ್ಶನದಲ್ಲಿ ಮೂರನೇ ಮಗುವಿನ ನಿರೀಕ್ಷೆಯಲ್ಲಿದ್ದೇನೆ ಎನ್ನುವ ಹೇಳಿಕೆಯನ್ನು ಕೊಟ್ಟು ದಂಗು ಮೂಡಿಸಿದ್ದಾರೆ. ಅರೇ... ಮೊದಲ ಗುಡ್ ನ್ಯೂಸ್ ಹೇಳಿದ್ದು, ಕೇಳಿಲ್ಲ. ಈಗ ಮೂರನೇ ಗುಡ್ ನ್ಯೂಸ್ ಯಾವುದಪ್ಪಾ ಅಂತಾ ಕೇಳಿದರೆ. ಶಿಲ್ಪಾರ ನೆಚ್ಚಿನ ಹೆಣ್ಣು ನಾಯಿ ಎರಡು ಮುದ್ದಾದ ಮರಿಗಳಿಗೆ ಜನ್ಮ ನೀಡಿದೆ ! ಈ ಎರಡು ಮುದ್ದಾದ ಮರಿಗಳು ತನ್ನದು ಎಂದು ಉದಾರತೆ ತೋರಿಸಿದ್ದಾರೆ.
ಅಂದಹಾಗೆ ಶಿಲ್ಪಾ ಮತ್ತು ತಾಯಿ ಸುನಂದಾ ಶೆಟ್ಟಿ ಜತೆಗೂಡಿ ಹೊಸ ಪ್ರಾಡ್ರಕ್ಷನ್ ಕಂಪನಿಯೊಂದನ್ನು ಹುಟ್ಟು ಹಾಕುತ್ತಿದ್ದಾರೆ. ಇದೇ ಶಿಲ್ಪಾರ ಮೂರನೇ ಗುಡ್ ನ್ಯೂಸ್ ಕಮ್ ಮೂರನೇ ಮಗುವಂತೆ ! ಇಂಡೋ- ಜಪಾನ್ ಬ್ಯಾನರ್ನಡಿಯಲ್ಲಿ ನಿರ್ಮಾಣವಾಗುತ್ತಿರುವ ‘ದೀ ಡಿಸೈಯರ್: ಎ ಜರ್ನಿ ಆಫ್ ದೀ ವುಮನ್ ’ಎನ್ನುವ ಚಿತ್ರ ಈಗಾಗಲೇ ಹಲವು ಫಿಲ್ಮ್ ಫೆಸ್ಟಿವಲ್ಗಳಿಗೆ ನಾಮಂಕಿತಗೊಂಡಿದೆ. ೯೫ ನಿಮಿಷಗಳಿಗೆ ಇಳಿಸಿರುವ ಈ ಚಿತ್ರದಲ್ಲಿ ನಾಟ್ಯಗಾರ್ತಿಯೊಬ್ಬರ ಸುತ್ತ ಹಣೆದ ಕಥೆಯಾಗಿದ್ದು ಈ ಚಿತ್ರದ ನಿರ್ಮಾಣದ ಜವಾಬ್ದಾರಿಯನ್ನು ಖುದ್ದು ಶಿಲ್ಪಾ ಶೆಟ್ಟಿ ತಾಯಿ ಸುನಂದಾ ಶೆಟ್ಟಿ ವಹಿಸಿಕೊಂಡಿದ್ದಾರೆ ಎನ್ನುವ ಮಾಹಿತಿಗಳು ಬಾಲಿವುಡ್ ಅಂಗಳದಲ್ಲಿ ಹರಿದಾಡುತ್ತಿದೆ.
ಇನ್ನು ಕೆಲವೇ ದಿನಗಳಲ್ಲಿ ಈ ಪ್ರಾಡಕ್ಷನ್ ಕಂಪನಿಯ ಕೆಲಸಗಳು ಆರಂಭವಾಗಲಿದೆ. ಇದರ ಜತೆಯಲ್ಲಿ ಖಾಸಗಿ ಟಿವಿ ವಾಹಿನಿಗಳಿಗೆ ಈ ಕಂಪನಿ ಹಲವು ಕಾರ್ಯಕ್ರಮಗಳನ್ನು ರೂಪಿಸಲಿದೆ. ಈ ಕಂಪನಿ ಹುಟ್ಟುವುದಕ್ಕೆ ಕಾಯುತ್ತಿದ್ದಾರೆ ಶಿಲ್ಪಾ. ಅದೂ ಆದರೆ, ಶಿಲ್ಪಾ ಮೂರು ಮಕ್ಕಳ ತಾಯಿಯಾದಂತೆ. ಬರೀ ಬೇರೆಯವರ ಮಕ್ಕಳ ಬಗ್ಗೆ ತಲೆ ಕರೆದುಕೊಂಡರೇ ಸಾಕೇ..? ನಮ್ಮ ಮಗು ಯಾವಾಗ ಎಂದು ಶಿಲ್ಪಾರ ಪತಿ ರಾಜ್ ಕುಂದ್ರಾ ಸಿಟ್ಟಾಗಿ ಕೇಳಿದ್ರೂ ತಪ್ಪಿಲ್ಲ ಅಲ್ವಾ..?
ಈ ಎಲ್ಲ ವಿಷ್ಯಾಗಳನ್ನು ಕೇಳುತ್ತಾ ಇದ್ರೆ, ಇದೇ ವರ್ಷದ ಮಾರ್ಚ್ ತಿಂಗಳ ಕೊನೆಯಲ್ಲಿ ಕಾರ್ಕಳದ ಗುತ್ತಿನ ನಾಗಬನದಲ್ಲಿ ಕರಾವಳಿಯ ಪೊಣ್ಣು ಶಿಲ್ಪಾ ಶೆಟ್ಟಿ ಪತಿ ರಾಜ್ ಕುಂದ್ರಾ ಜತೆ ಸೇರಿಕೊಂಡು ನಾಗಬನದ ಸುತ್ತ ಬರೀ ಕಾಲಲ್ಲಿ ಪ್ರದರ್ಶನ ಹಾಕಿ ಬೇಡಿದ ಪ್ರಾರ್ಥನೆಯಂತೂ ನಾಗ ಲೋಕಕ್ಕೆ ಮುಟ್ಟಿರಬಹುದು ಎಂದು ಕುಡ್ಲ ಪೇಟೆ ಮೂಲೆಯಲ್ಲಿ ನಿಂತು ಎಲೆ ಅಡಕೆ ಜಗಿಯುವ ಹಿರಿಯರು ವಟಗುಟ್ಟುತ್ತಿದ್ದಾರೆ. ಅದೇನ್ ಇರಲಿ ಈ ಮೂರು ಗುಡ್ ನ್ಯೂಸ್ಗಳನ್ನು ಬಿಟ್ಟು ನಾಲ್ಕನೇ ಗುಡ್ ನ್ಯೂಸ್ ಯಾವಾಗ ಅಂತಾ ಶಿಲ್ಪಾರಲ್ಲಿ ಕೇಳಲೇ ಬೇಕು. ಈ ಗುಡ್ ನ್ಯೂಸ್ ಬೇರೆ ನ್ಯೂಸ್ಗಳ ಜತೆಯಲ್ಲಿ ಮಿಕ್ಸ್ ಆಫ್ ಹಾಗದಿದ್ದಾರೇ ಸಾಕು ಅಲ್ವಾ..?

ಬಾಲ್ಡ್ ಬ್ಯೂಟಿ ಶಿಲ್ಪಾ
ಬಾಲಿವುಡ್ ನಟಿ ಶಿಲ್ಪಾ ಶೆಟ್ಟಿ ಯಶ್ರಾಜ್ ಬ್ಯಾನರ್ನ ‘ದೋಸ್ತಾನಾ’ ಚಿತ್ರದ ಐಟಂ ಸಾಂಗ್ನ ನಂತರ ‘ದೀ ಡಿಸೈಯರ್’ ಚಿತ್ರದಲ್ಲಿ ಸಂಪೂರ್ಣವಾಗಿ ಮುಳುಗಿದ್ದರು. ಭಾರತೀಯ ಕಲೆ, ಸಂಸ್ಕೃತಿ, ನೃತ್ಯ ಮೊದಲಾದ ವಿಚಾರಗಳ ಸುತ್ತ ಗೌತಮಿ ಎಂಬ ನಾಟ್ಯಗಾರ್ತಿ ಚೀನಾದ ವ್ಯಕ್ತಿಯೊಬ್ಬನನ್ನು ಪ್ರೀತಿಸುವ ಕಥಾ ಹಂದರವನ್ನು ಚಿತ್ರ ಹೊಂದಿದೆ. ಚಿತ್ರದ ಕೇಂದ್ರ ಬಿಂದುವಿನಲ್ಲಿ ಶಿಲ್ಪಾ ಶೆಟ್ಟಿ ಕಾಣಿಸಿಕೊಳ್ಳುತ್ತಿದ್ದಾರೆ. ಚಿತ್ರದಲ್ಲಿ ಕೂದಲು ಕಳೆದುಕೊಂಡು ಬಾಲ್ಡ್ಯಾಗಿ ಶಿಲ್ಪಾ ನಟಿಸುವ ಮೂಲಕ ಬಾಲಿವುಡ್ನಲ್ಲಿ ಹೊಸ ಗೆಟಪ್ಗೆ ಶಿಲ್ಪಾ ನಾಂದಿ ಹಾಡಿದ್ದಾರೆ. ಎಲ್ಲವೂ ಬಾಲಿವುಡ್ನಲ್ಲಿ ಉಳಿಯುವ ಕಸರತ್ತು ಎಂದು ಬಣ್ಣದ ನಗರಿಯ ಪಂಡಿತರ ಮಾತು.