ಜಾಕ್ಪಾಟ್ ಜಾಕ್ಲೀನ್ !

‘ಅಲ್ಲಾದ್ದೀನ್’ ಎಂಬ ಮಾಯಾ ದೀಪದಿಂದ ಹೊರಬಂದ ಹಾಟ್ ಹುಡುಗಿ ಜಾಕ್ಲೀನ್ ಫೆರ್ನಾಂಡೀಸ್ ಎಲ್ಲಿ ಹೋದರು ಎಂದು ಕೇಳಿದವರೆ ಜಾಸ್ತಿ. ಕೈಯಲ್ಲಿ ಸರಿಯಾದ ಚಿತ್ರಗಳಿಲ್ಲ ಎಂದು ತವರು ಮನೆ ಸೇರುತ್ತಿದ್ದ ಹುಡುಗಿ ಈಗ ಮತ್ತೆ ಮುಂಬಯಿ ನಗರಿಯ ಚಿತ್ರಗಳನ್ನು ದೋಚಿದ್ದಾಳೆ ಎನ್ನುವ ಸುದ್ದಿ ಇದೆಯಂತೆ...

ಬಾಲಿವುಡ್ನ ಗಲ್ಲಾ ಪೆಟ್ಟಿಗೆಯಲ್ಲಿ ಉದ್ದುದ್ದ ಮಲಗಿ ಹೋದ ‘ಅಲ್ಲಾದ್ದೀನ್’ ಚಿತ್ರ ನೋಡಿದವರಿಗೆ ಈ ಸುಂದರಿಯ ಪರಿಚಯ ಖಂಡಿತ ಇರಬಹುದು. ಅದೇ ಅಲ್ಲಾದ್ದೀನ್ ಎನ್ನುವ ಮಾಯ ದೀಪದಿಂದ ಹೊರಬಂದ ಶ್ರೀಲಂಕಾದ ಸುಂದರಿ ಜಾಕ್ಲೀನ್ ಫೆರ್ನಾಂಡೀಸ್ ‘ಜಾನೇ ಕಾಹ ಸೇ ಅಯಿ ಯೇ ಹೋ’ ಹಾಗೂ ‘ಹೌಸ್ಫುಲ್’ ಚಿತ್ರದ ನಂತರ ಎಲ್ಲೋ ಮರೆಯಾಗಿ ಹೋದಳು ಎನ್ನುವ ಸುದ್ದಿ ಹರಡಿಕೂತಿತ್ತು. ಶ್ರೀಲಂಕಾದ ಜಾಹೀರಾತು ಕಂಪನಿಗಳಿಗೆ ಆಗಾಗ ಮುಖ ತೋರಿಸಿ ಬರುತ್ತಿದ್ದಾಳೆ ಎಂಬ ಮಾತು ಹರಡಿತ್ತು. ಇನ್ನೂ ಮುಂದೆ ಮುಂಬಯಿ ಹಾಗೂ ಶ್ರೀಲಂಕಾ ನಡುವಿನ ಮಾತುಕತೆ ಇಲ್ಲಿಗೆ ಮುಗಿದು ಹೋಗುತ್ತದೆ ಎನ್ನುವ ಮಾತುಗಳು ಹರಿದಾಡಿ ತ್ತು.
ಆದರೆ ಜಾಕ್ಲೀನ್ ಮತ್ತೆ ಬಾಲಿವುಡ್ ಇಂಡಸ್ಟ್ರಿಗೆ ರೀ ಎಂಟ್ರಿ ಹೊಡೆದಿದ್ದಾರೆ. ಅದೂ ಕೂಡ ಜಾಕ್ಪಾಟ್ ಎಂಟ್ರಿ. ಬಾಲಿವುಡ್ ನಿರ್ದೇಶಕ ಮಹೇಶ್ ಭಟ್ರ ಹೋಂ ಬ್ಯಾನರ್ ‘ವಿಶೇಷ್ ಫಿಲ್ಮ್ಂ’ ಅಡಿಯಲ್ಲಿ ಬರುತ್ತಿರುವ ‘ಮರ್ಡರ್-೨’ ಚಿತ್ರದಲ್ಲಿ ಜಾಕ್ಲೀನ್ ಕಿಸ್ಸಾರ್ ಬಾಯ್ ಇಮ್ರಾನ್ ಹಸ್ಮಿಗೆ ಸಾಥ್ ಕೊಟ್ಟಿದ್ದಾಳೆ. ಜುಲಾಯಿ ಮೊದಲ ವಾರ ಈ ಚಿತ್ರ ತೆರೆಗೆ ಅಪ್ಪಳಿಸುವ ಕುರಿತು ಈಗಾಗಲೇ ಪ್ರೇಕ್ಷಕರ ವರ್ಗ ಸೂಚನೆ ಬಂದಿದೆ. ಈ ಚಿತ್ರ ರಿಲೀಸ್ ನಂತರ ಜಾಕ್ಲೀನ್ ನಾಡಿಯವಾಲಾರ ‘ಹೌಸ್ಪುಲ್-೨’ ಚಿತ್ರದಲ್ಲಿ ಲೀಡ್ ರೋಲ್ನಲ್ಲಿ ಕಾಣಿಸುತ್ತಿದ್ದಾರೆ. ಅಂದಹಾಗೆ ಈ ಹಿಂದೆ ತೆರೆಗೆ ಬಂದ ‘ಹೌಸ್ಫುಲ್’ನಲ್ಲಿ ಜಾಕ್ಲೀನ್ ಬರೀ ಒಂದು ಐಟಂ ಸಾಂಗ್ನಲ್ಲಿ ಕಾಣಿಸಿಕೊಂಡಿದ್ದರು.
ಅಲ್ಲಿಗೆ ಅವರ ಸಿನಿಮಾ ಬದುಕು ನಿಂತು ಹೋಗಿತ್ತು ಎಂದು ಗಲ್ಲಿಯಲ್ಲಿ ಗಾಸಿಪ್ ಎಬ್ಬಿಸಿದ್ದರು. ಲಂಡನ್ನಲ್ಲಿ ಹೌಸ್ಫುಲ್-೨ ಚಿತ್ರೀಕರಣ ನಡೆಯುತ್ತಿದ್ದು, ಈ ವರ್ಷದ ಕೊನೆ ಭಾಗದಲ್ಲಿ ತೆರೆಗೆ ಬರುವ ಚಾನ್ಸ್ ಇದೆ ಎನ್ನೋದು ನಿರ್ಮಾಣ ಸಂಸ್ಥೆಯ ಮಾತು. ಇದರ ಜತೆಯಲ್ಲಿ ಹೌಸ್ಫುಲ್ ಚಿತ್ರದ ಬ್ಯುಸಿ ಷೆಡ್ಯುಲ್ನಿಂದಾಗಿ ಮರ್ಡರ್-೨ ಚಿತ್ರದ ಪ್ರಚಾರಕ್ಕೆ ಜಾಕ್ಲೀನ್ ಬರುತ್ತಿಲ್ಲ ಎನ್ನುವ ಸುದ್ದಿಗಳು ನಿರ್ಮಾಪಕರ ಕಡೆಯಿಂದ ಬರುತ್ತಿದೆ. ಗಾಸಿಪ್ಗಳಿಂದ ದೂರನೇ ಉಳಿದು ಬಿಡುತ್ತಿದ್ದ ಜಾಕ್ಲೀನ್ ಫೆರ್ನಾಂಡೀಸ್ ಒಂದೆರಡು ಚಿತ್ರಗಳಿಂದ ನಿರ್ಮಾಪಕರಿಗೆ ಕಿರಿಕ್ ಕೊಡಲು ಆರಂಭ ಮಾಡಿದ್ದಾಳೆ ಎನ್ನುವ ಮಾತು ಪಡಸಾಲೆಗೆ ಬಿದ್ದು ಬಿಟ್ಟಿದೆ. ಜಾಕ್ಲೀನ್ ಫೆರ್ನಾಂಡೀಸ್ ಮಾತ್ರ ಈ ಎಲ್ಲ ವಿಚಾರಗಳಿಗೆ ಸೊಪ್ಪು ಹಾಕದೇ ಕೂತಿದ್ದಾಳೆ.
ಇತ್ತ ಕಡೆ ಮಹೇಶ್ ಭಟ್ ‘ಮರ್ಡರ್-೨’ ಮುಂಬಯಿಯ ಪ್ರಚಾರಕ್ಕೆ ಬರುವಂತೆ ಜಾಕ್ಲೀನ್ಗೆ ಕೇಳಿಕೊಂಡಿದ್ದಾರಂತೆ. ಮಹೇಶ್ರ ಮಾತು ಕೇಳಿದ ಜಾಕ್ಲೀನ್ ಎಲ್ಲಕ್ಕೂ ಯೆಸ್ ಎಂದಿದ್ದಾಳೆ . ಈ ವಿಚಾರದಿಂದ ತೃಪ್ತರಾದ ಭಟ್ಟರು ತನ್ನ ಮುಂದಿನ ಎರಡು ಚಿತ್ರಗಳಿಗೆ ಜಾಕ್ಲೀನ್ ಫೆರ್ನಾಂಡೀಸ್ರನ್ನು ಹಾಕುವ ಮನಸ್ಸು ಮಾಡಿದ್ದಾರಂತೆ ಎನ್ನುವ ಸುದ್ದಿ ಗಾಸಿಪ್ ಗಲ್ಲಿಯಿಂದ ಕೇಳಿಬರುತ್ತಿದೆ. ಈ ಮೂಲಕ ಮಹೇಶ್ ಭಟ್ಟರ ಕ್ಯಾಂಪ್ನಲ್ಲಿ ಇರುವ ಯಾವುದೇ ಸಿನಿಮಾ ತಾರೆಯಾದರೂ ಒಂದೆರಡು ಸಿನಿಮಾಗಳಲ್ಲಿ ನಟಿಸದೇ ವಾಪಾಸು ಹೋಗುವಂತಿಲ್ಲ ಎನ್ನುವ ಚಾಲ್ತಿಯಲ್ಲಿದ್ದ ಮಾತಿಗೆ ಈಗ ಪುಷ್ಠಿ ದೊರೆತಾಂಗಿದೆ.
ತನಗೆ ನಟಿಸಲು ಚಿತ್ರಗಳಿಲ್ಲ ಎಂದು ಪದೇ ಪದೇ ತವರು ಮನೆಗೆ ಓಡಾಡುತ್ತಿದ್ದ ಜಾಕ್ಲೀನ್ಗೂ ಈ ಮೂಲಕ ಮುಂಬಯಿಯಲ್ಲಿಯೇ ಒಂದೆರಡು ವರ್ಷಗಳ ಕಾಲ ಉಳಿಯುವಂತಾಗಿದೆ. ಜಾಕ್ಲೀನ್ರ ಆಕ್ಟಿಂಗ್ನಿಂದಲೋ, ಮೈಮಾಟದಿಂದಲೋ ‘ಮರ್ಡರ್-೨’ ಬಾಲಿವುಡ್ನಲ್ಲಿ ಕ್ಲಿಕ್ ಆಯಿತು ಎಂದಾದರೆ ಮತ್ತೆರಡು ಸಿನಿಮಾ ನಿರ್ಮಾಪಕರು ಜಾಕ್ಲೀನ್ರ ಮನೆ ಮುಂದೆ ಕಾದು ಕೂರಬಹುದು. ಒಟ್ಟಾರೆ ಚಿತ್ರದ ಪೋಸ್ಟರ್ಗಳು ಹಸಿಬಿಸಿಯಿಂದ ಸುದ್ದಿಯಾಗಿದೆ. ಚಿತ್ರ ಗಲ್ಲಾಪೆಟ್ಟಿಗೆಯಲ್ಲಿ ಸುದ್ದಿ ಮಾಡುತ್ತಾ ಎನ್ನೋದು ಡಾಲರ್ ಪ್ರಶ್ನೆ.